Probablemente esta é imaxe máis antiga que se conserva do fútbol esteiran. Foi publicada no imprescindible libro de Manuel Torres Fernández sobre o fútbol en Esteiro. Correspóndese con un partido celebrado no campo do Artón o día de Santa Mariña do fatídico 1936. Foi enviada a Esteiro dende a outra beira do Atlántico, dende Bos Aires, polo señor Romero "Petete" antes de falecer.
Gracias a memoria do vello Torea de Uhía, hoxe podemos coñecer que se trata do equipo INFANTIL ESTEIRANA, que xurdira daquela no seo da "sociedade" existente na nosa parroquia. Que a equipaxe dos rapaces fora amendada coas teas dos sacos de fariña que había no economato da Protección Social Esteirana. E que ao traxe se lle engadíra unha cinta de cor vermella que cadaquén apañaba de onde podía. Manuel Torres cóntanos no seu libro como José do Lévado mesmo foi quen de rachar o mantelo da súa avoa para contar con este traxe.
Para a memoria de todos os siareiros da Esteirana, contamos que esta foto correspóndese con un partido celebrado o día da festa de Santa Mariña de 1936 entre os rapaces de Esteiro e do Porto do Son. Naquel tempo era costume que á festa de Santa Mariña acudiran romeiros das dúas bandas da ría a celebrar a santa. Polo que é previsible que houbera moita xente aquel día no Artón. O resultado do partido foi 5 a 1 para os locais.
É coñecido que naquela tarde do 18 de xullo de 1936, e polo tanto probablemente durante o xogo, un hidroavión procedente da base militar de Marín embocou a ría con dirección a Noia lanzando octaviñas comunicando o inicio da sublevación militar para convencer aos carabineiros que se mantiñan fieis á República. E avanzando o inicio da longa noite de pedra -como a bautizaría o poeta Celso Emilio Ferreiro- de corenta anos que nos caeu despois.
Para a historia do fútbol esteirán quedará a aliñación deste equipo de INFANTIL ESTEIRANA, que é a seguinte:
De pé: RICARDO de Somorto, LUCIANO, JOSÉ do Lévado, CERNADAS.
Anicados: MONCHO do Cabo, TOREA, Romero "PETETE", FOSQUEIRO.
De xeonllos: GELUCHO de Somorto, BEIRO, FRANCISCO de Pío.
No hay comentarios:
Publicar un comentario